Հայաստանի Հանրապետության նախագահ Արմեն Սարգսյանը Երևանում միացել է Հաղթանակի օրվա առթիվ կազմակերպված «Անմահ գունդ» ակցիային։
«Այսօր մեզ մոտ մեծ տոն է` Արցախի ազատագրական պայքարում տարած հաղթանակի օրը, մեր ժողովրդի հերոսական ավանդը Հայրենական մեծ պատերազմում և երեկվա հաղթանակը», – լրագրողներին ասաց Սարգսյանը։
Նախագահը նշեց, որ նախօրեին ժողովուրդն արտահայտել է իր կամքը, և այդ կամքի համաձայն` խաղաղ ու օրինական միջոցներով Սահմանադրության շրջանակում ընտրվել Հայաստանի վարչապետ։
Հայաստանի Հանրապետության նախագահը նոր վարչապետին ու երկրի կառավարությանը մեծ հաջողություններ մաղթեց աշխատանքում։
Երթը գլխավորում է Հայաստանի Հանրապետությունում Ռուսաստանի դեսպան Իվան Վոլինկինը կնոջ` Սվետլանա Ռամիշվիլիի հետ միասին։
Ակցիային մասնակցում են ռազմական բուհերի կուրսանտներ, ՀՀայաստանի Հանրապետության ՊՆ, ԱՊՀ երկրների դիվանագիտական ներկայացուցչությունների, Հայ առաքելական եկեղեցու, հասարակական կազմակերպությունների ներկայացուցիչներ, ուսանողներ և դպրոցականներ։
Ակցիայի կազմակերպիչներն են «Հայաստանի Անմահ գունդ» հայրենասիրական հասարակական կազմակերպությունը և ՀՀ ՊՆ–ն։
Հայաստանում «Անմահ գնդի» երթը տեղի է ունենում արդեն երրորդ անգամ։ 2017թ–ին դրան մասնակցել է ավելի քան 4 հազար մարդ, ինչը մի քանի անգամ շատ է, քան 2016թ–ին։
