Արեւմտյան Հայաստանի Հանրապետության Անկախության օրվա` հունվարի 19-ի առթիվ ԱՀՀ պետական կառույցների պատասխանատուների ասուլիս

Հունվարի 18-ին «Նոյյան Տապան» լրատվական գործակալության մամուլի սրահում տեղի ունեցավ ասուլիս՝ Արեւմտյան Հայաստանի Հանրապետության Անկախության օրվա` հունվարի 19-ի առթիվ ԱՀՀ պետական կառույցների պատասխանատուների մասնակցությամբ։

Բանախոսներ՝

Արմենակ Աբրահամյան – Արեւմտյան Հայաստանի Հանրապետության Նախագահ, (Skype-ով),
Տիգրան Փաշաբեզյան – Արեւմտյան Հայաստանի Հանրապետության Վարչապետ,

Թեման` «Հայաստան պետության անկախության «դե ֆակտո» ճանաչումը 1920 թ. հունվարի 19-ին, Փարիզի Վեհաժողովի ժամանակ, Դաշնակից Տերությունների Գերագույն Խորհրդի կողմից»:

Հայության մի մասը հունվարի 19-ին նշելու է Արևմտյան Հայաստանի Հանրապետության` (ԱՀՀ) որպես Հայաստան պետության անկախության «դե ֆակտո» ճանաչման 97-րդ ամյակը: Ինչպես հունվարի 18-ին կայացած ասուլիսի ընթացքում տեղեկացրեց  ԱՀՀ նախագահ Արմենակ Աբրահամյանը, այս կապակցությամբ տոնական միջոցառումներ են անցկացվելու Ռուսաստանում և Ֆրանսիայում:

Ըստ նրա` այսօր աշխարհի հայությունն ապրում է այնպիսի պայմաններում, երբ որոշ քաղաքական ուժեր ամեն ինչ անում են, որպեսզի հայ ժողովրդին արհեստականորեն շեղեն սեփական երկրի նկատմամբ ունեցած իրավունքներից:

Ա. Աբրահամյանը, մեջբերելով ժամանակին Արցախյան ազատամարտի հերոս Լեոնիդ Ազգալդյանի հետևյալ խոսքերը. «Սա Հայաստան է և վերջ», ընդգծեց, որ նա այն ժամանակ խոսում էր Հայաստան պետության մասին` չտարանջատելով Արցախը և Արևմտյան Հայաստանն Արևելյան Հայաստանից: