Անհրաժեշտ է ճշտել և արձանագրել Օսմանյան կայսրությունում Հայոց ցեղասպանության բոլոր զոհերի անունները։ Այս մասին Ազգային ժողովում ապրիլի 15-ին ավանդական ճեպազրույցների ժամանակ ասաց իշխող «Քաղաքացիական պայմանագիր» կուսակցության պատգամավոր, Պաշտպանության և անվտանգության հարցերի մշտական խորհրդարանական հանձնաժողովի նախագահ Անդրանիկ Քոչարյանը։
«Եվ դրա համար ամաչելու կարիք չկա։ Մինչև անկախության հռչակումը դրանով պետք է զբաղվեին Հայ առաքելական եկեղեցին, հայկական քաղաքական կուսակցությունները, ինչպես նաև սփյուռքի կառույցները։ Բոլոր զոհերի անուն-ազգանունները պետք է լինեն Երևանի ցեղասպանության թանգարան-ինստիտուտի տրամադրության տակ»,- ընդգծեց պատգամավորը։
«Մինչև հիմա, մենք այդ անվանական ցանկը չենք կարողացել հավաքել, պետք է կենտրոնանանք այդ ցանկը փաստարկված հավաքագրելու համար: Ունենք թանգարան, ցեղասպանության հետ կապված ամեն ինչ ունենք, գիտաժողովներ, գրքեր, դոկտորական աշխատանքներ, բայց պետք է ունենանք ամենակարևորը՝ այդ միլիոնուկեսի անուն, ազգանունը, որտե՞ղ, ո՞նց, ի՞նչ պայմաններում, որպեսզի դա լինի շատ թիրախային։ Մենք այդ խնդիրը տասնյակ տարիներով չենք լուծել։ Այ հիմա հենց իրական Հայաստանը տալիս է այդ հնարավորությունը նաև ցեղասպանության բաց թողումը դարձնել իրականություն։ Պարզ է չէ՞, որ եթե ասում ենք՝ միլիոնուկես հայ է կոտորվել, պետք է կարողանանք միլիոնուկես ազգանուն ինչ-որ արխիվներում հանենք ու դնենք, Ցեղասպանության թանգարանի պատը պետք է լրացված լինի հենց այդ ազգանուններով»,- ասել է Անդրանիկ Քոչարյանը:
Նրա կարծիքով, եթե դա մինչև այժմ չի արվել, ապա բացը պետք է լրացնել։ Հակառակ դեպքում, հակառակ կողմը, այսինքն՝ Թուրքիան կշարունակի պնդել, որ Հայոց ցեղասպանություն չի եղել։
Քոչարյանը կոչ արեց լրատվամիջոցներին որևէ հնարք չփնտրել այս նախաձեռնության մեջ, քանի որ իր շարժառիթը բավականին անկեղծ է։
